Gravados rupestres, petroglifo de Xampardiño, Santo Adrián de Calvos

Dentro do pasado arqueolóxico de Fornelos de Montes atopamos estes restos de gravados rupestres. Están situados na parroquia de San Adrián de Calvos. Representan gravados rupestres da Idade de Bronce e indícannos a presenza humana anterior á dominación romana.

Para atopalos saímos dende a igrexa de San Adrián de Calvos. Chegamos ata ás últimas casas, collemos unha pista que se interna no monte, a uns 2 km e, xa arriba, hai un momento no que que podemos divisar a Ría de Vigo, pois xusto aí, no chan, podemos ver a rocha cos gravados.

Este petróglifo, orientado cara ao leste, presenta unha combinación circular na parte máis alta da rocha. Xunto a ela podemos ver cazoletas, liñas e cruces. Na parte superior do penedo, na rocha lindeira cara ao norte, aparecen tamén diferentes cazoletas desligadas do gravado principal.

Animámoste a atopalos!