O CUVI

Situado a 15 km do centro de Vigo, o campus universitario Lagoas-Marcosende é o principal enclave académico-administrativo da Universidade de Vigo. Está situado nunha contorna natural singular, que se estende pola ladeira sur dunha zona montañosa na que se localiza a parroquia de Zamáns, a unha altitude de entre 390 e 450 m sobre o nivel do mar. Dende os miradoiros situados nas proximidades do campus universitario pódese percibir toda a beleza da ría de Vigo.

O campus é un lugar de contraste no cal se combinan modernas construcións  cunha paisaxe natural de gran beleza e riqueza biolóxica. Proxectado no 1999 polo estudio Miralles Tagliabue é un referente da arquitectura contemporánea para Galicia. Alberga facultades, o edificio do Rectorado e o edificio de servizos centrais, varios edificios de investigación, unha gran biblioteca central do campus, unha residencia de estudantes.

Nesta contorna paisaxística habita unha ampla variedade de especies animais, tales como o lagarto arnal, a águia ratoeira e o coello, así como cabalos salvaxes que forman parte da cultura secular galega. Así mesmo, pódese atopar unha gran diversidade de especies vexetais de orixe autóctona e alóctona. Os restos arqueolóxicos tamén forman parte do campus, cos xacementos megalíticos do Monte das Pedreiras como máximo expoñente e nos que se atopan restos significativos dun poboado da fin da era do bronce.

Igualmente, no campus Lagoas-Marcosende cóntase coa posibilidade de practicar diferentes deportes, tanto en instalacións ao aire libre (pistas de atletismo e fútbol, pistas de tenis, rugbi …) como no interior de recintos (piscinas, ximnasio, …).

Se o que desexas é tranquilidade e relax, nos arredores do campus pódese gozar de amplos espazos habilitados como merendeiros en pleno contacto coa natureza.